第一年下大雨, 和小榆, Dan, 爸爸，媽媽去, 很狼狽, 我們玩了一會便離去了。
第二年係星期六, 爸爸要返工, 得我同翀翀兩個去。係去海洋公園的巴士上, 翀翀已睡了。 我一個人抱著他, 好不容易行到入口, 找到間小店, 坐下等他睡醒。因為是星期六, 而且中午, 海洋公園超多人。我們搭了纜車, 看了海洋劇場便離開了。但海洋劇場這麼多座位, 好不容易, 我才和翀翀找到一個位, 現在的海洋公園真的超多人。之後爸爸落場, 係海洋公園門外接我們, 送我們搭車走, 爸爸又要返工了。
今年,雖然阿妹只係出左世18日, 難得爸爸放假陪我們, 真的很希望可以帶孩子去走走, 所以我還未坐完月, 就帶著妹妹, 哥哥, 跟著爸爸出發了。今次, 翀翀大個了小小, 支持到玩完回程, 在巴士上才睡覺。我們先參觀了海洋館睇魚, 因要找地方餵奶, 所以爸爸和翀翀參觀, 媽媽就同珒珒去育嬰室。爸爸還帶了翀翀去熊貓館。之後集合返, 我們去了坐小火車, 迴旋木馬, 看威威劇場。爸爸說翀翀咩都驚, 驚鯊魚, 八爪魚, 係熊貓館俾隻馬騮嚇親, 他又怕威威司令, 阿仔好似越來越細膽豬。
中午時間在附近熊貓餐廳午膳, 係海洋公園食野真的很貴, 一個大人餐一個小童餐一個小食, 一杯飲品已經三百幾, 等於入場費咁貴。食完野, 我同阿妹去育嬰室, 爸爸和翀翀去跳彈彈床。因這個育嬰室好細而且有隻野飛來飛去, 食左一陣, 我們就走啦！爸爸和翀翀係彈彈床隔離的公園玩。之後見隔離摩天輪等遊戲都不多人, 媽媽鼓勵翀翀樣樣都玩下。起初翀翀都say no, 不過之後都肯去試玩, 玩摩天輪因為迪士尼無, 叫做玩啲唔同的野。雖然, 摩天輪細細又慢慢, 但一家人一次參與的, 感覺很好, 真幸福。爸爸還在摩天輪上見到自己公司, 好似好想念返工咁。迪士尼有一個對小朋友來說很高的跳樓機, 翀翀三歲時玩都不怕, 爸爸說翀翀不會驚海洋公園這個。 於是媽媽陪翀翀去玩, 點知只玩了幾下, 翀翀已驚得很...我告訴他, 你大喊就不會驚, 他驚到連大喊都做唔到。我看到他這個驚青樣, 我的心比他更想快啲玩完, 快點離開。還有一個飛高飛低的機動遊戲。 我們叫他小飛機, 翀翀比較鐘意玩這個。玩晒已經有啲晏, 我們急急去坐纜車, 坐了來回, 便回程, 回家已經5點。離開海洋公園, 大家已很累, 相信媽媽一個是不能帶兩個小朋友出街玩。翀翀今日應該都玩得很開心。珒珒全程瞓覺。 媽媽都很開心, 因為生日可以一家人去遊玩。
回到家, 媽媽太累要沖個涼醒神下, 之後爸爸好快咁幫珒珒, 翀翀沖白白。 姨媽特登來煮靚餸俾媽媽食。有班球腩, 有大海蝦, 扇貝。辛苦姨媽精心安排。^__^翀翀已很累, 但仍很乖很合作, 很快吃好晚飯, 跟爸爸回公公家休息, 明天要返學啦！媽媽, 爸爸, 姨媽都讚翀翀今晚食飯叻叻, 翀翀話: 我都要氹下媽媽開心嘛！哈, 我的寶貝仔真窩心!
爸爸還和翀翀寫了張生日咭給媽媽。第一次收到有仔仔塗鴉的生日咭很開心, 謝謝老公, 謝謝翀翀, 謝謝姨媽。 謝謝珒珒！
沒有留言:
張貼留言