珒珒食母乳?!...

一直都好希望可以餵母乳給翀翀和珒珒。但翀翀當年是失敗了。醫院常建議補少少奶粉, 由於當年無經驗, 奶粉補了, 翀翀食過奶咀就食唔返母乳。餵奶粉的確簡單, 而且可以好好休息。但由出世到依家, 翀翀每兩個月便要看醫生, 轉天氣, 太熱太凍, 翀翀都容易病。>___< 心痛死媽媽, 每次病了, 媽媽都很擔心很心痛, 徹夜不能眠。
珒珒出世, 媽媽又是全職湊仔, 好希望可以嘗試俾到珒珒食母乳。
首先就係一直堅持希望唔食奶粉, 因為怕會好似哥哥咁, 返唔到轉頭。不過因為妹妹都有黃, 有一日去到250, 如果270就要入院照燈啦！當年翀哥哥入院照燈, 瞓係個玻璃箱仔, 一路喊, 媽媽心痛得忍不住流淚。好想抱住寶貝仔, 又唔抱得, 日日去醫院餵奶。 但一日得4節餵奶, 其他時間只可以吃奶粉, 所以翀哥哥最後都食唔到母乳。
一諗起要照燈我就怕, 所以即使要補奶粉都想珒珒退到黃再算。
我諗吃母乳都幾攰, 珒珒每次食十分鐘便睡了。一幅很滿足的樣, 健康院姑娘說要食30分鐘, 但珒珒從來都食唔到咁長時間。不眠不休的餵奶, 成個人都很疲累。出左院第二日, 唔知係咪黃, 阿妹完全唔肯食, 一餵她便大哭, 和珒珒週旋了成個鐘, 最後心灰意冷想放棄了。第二日, 到健康院回來, 阿妹又突然食得幾好, 又有動力再走下去。不過到目前為止, 珒珒吃母乳, 仍然好反覆, 好多時都掛住瞓覺唔食, 唉…擔心死人!! 其實我覺得餵母乳幾難, 唔係媽媽唔想餵, 只係有時真係好睇個小朋友, 肯唔肯食。而且不眠不休, 真的好考媽媽的堅持。珒珒, 媽媽好希望餵到你6個月, 6個月後再訂新目標。
今日係健康院回來, 珒珒又輕了, 得2.61kg, 出世時2.8kg, 還未追得返。珒珒你要努力, 媽媽都會盡能力, 俾你食多啲, 希望你一日比一日大個食得耐啲同叻啲。媽媽很想俾最好的野你, 讓你擁有健康成長。我愛你, 心肝!

24/4/2014
今日去健康院, 珒珒有2.63磅。沒有再輕, 但依然追唔到出世時體重。醫生同姑娘都建議要補奶粉。唉…媽媽唔知仲可以堅持多久。媽媽已很盡力去餵。珒珒，你要加油, 媽媽知道你胃口細, 亦知食母乳你要重得快應該唔可能, 唉…媽媽都好怕返唔到轉頭。好怕好快要結束要放棄, 你乖乖食多啲, 勤力啲食丫。媽媽有很多擔心, 很需要爸爸的支持, 你知道嗎？我不知最後能否繼續走下去, 但我已盡了最大努力。
今天, 在健康院見母乳姑娘, 見左好耐。她要媽媽多休息, 必要時補奶粉, 希望珒珒體重先有增長, 再算。因為見了姑娘很耐, 爸爸曾經去搵我同珒珒, 卻被個職員誤導了, 以為我同阿女唔見左。爸爸竟然跑回家看, 又跑回健康院。真係估佢唔到。 珒珒, 你睇下爸爸幾緊張你。爸爸生命中有3個女人, 一個係爸爸的媽媽, 一個係媽媽, 另外一個就係你, 好快你就會偷走晒爸爸的心。哈!

因為, 被打擊了！自己都不肯定, 珒珒係咪唔夠食。 媽媽學習從來都係很慢, 別人很容易學會的, 而我總是很多問號, 連聽都未聽得惦。唉…是媽媽不懂餵你, 令你吃得不長久, 還是什麼？我的感覺一切都是足夠, 適合。但我也很怕感覺錯了, 我給自己多休息, 亦不堅持一定要母乳, 但珒珒吃的時間更短了...是否快要結束?...